متمرد

خارج من دنياك
من غير مطرود
مش ناوى اعود
وهكسَّر تابوهاتك
وصوابعك
وهجبس عِندك
هتمرد على كل جنون العالم
بجنونى الخاص.
اشطب تواريخى
امسحنى من لوحك
واكتب:
متمرد
الموت بطَّلته
ولا نافع احباط
ولا سم
وفعز الهم:
بارقص
ولا اجدع رقاصة فى مولد
حلمى المطبوع على بوستر من غير الوان
هيبان
هيخبط على كل بيبان النوم
هيصحى المخمور والدايخ
والبايخ :
يولع
عقلى هيخف
وهتف
على كل الاسفار الصفرة
الخرسة
وهسوِّد كفنك
قطع من لحمى بمنشارك
وارميه فى البحر
بعتر دمى على الرصفان
مش هسجد قدامك تانى
ا نشا الله ابقى يسوع مصلوب
او يونس مبلوع
لكن مش هبقى التابع وانت المتبوع
انا مش اعمى
ونظارتى ماهياش مكسورة
والكلمة على جبينك واضحة:
ك.ا.ف.ر
عبدالسميع عبدالله
الاسكندرية
5-5-2010